खोपोलीत गुन्हा करून कराडच्या दिशेने पलायन; पांढऱ्या वेरनासह तिघांना घेतले ताब्यात
सातारा दि 30 प्रतिनिधी
रायगड जिल्ह्यातील खोपोली येथे गुन्हा करून कराडच्या दिशेने पसार होण्याच्या प्रयत्नात असलेल्या तीन आरोपींना तळबीड पोलिसांनी तासवडे टोलनाक्यावर सापळा रचून जेरबंद केले. पोलिसांच्या सतर्कतेमुळे आरोपींचे पलायन रोखण्यात यश आले असून, पांढऱ्या रंगाच्या ह्युंदाई वेरना कारसह तिघांना ताब्यात घेण्यात आले आहे. परजिल्ह्यातील गुन्ह्यातील आरोपींचा माग काढत तळबीड पोलिसांनी दाखवलेल्या तत्परतेची परिसरात चर्चा सुरू आहे.
रायगड जिल्ह्यातील खोपोली पोलीस ठाण्यात गुन्हा रजिस्टर क्रमांक ३८४/२०२६ अन्वये भारतीय न्याय संहिता कलम ३०३ (२) नुसार गुन्हा दाखल आहे. या गुन्ह्यातील आरोपी खोपोली पोलीस ठाण्याच्या हद्दीत गुन्हा करून कराडच्या दिशेने येत असल्याची गोपनीय माहिती तळबीड पोलिसांना मिळाली होती. माहितीचे गांभीर्य ओळखून तळबीड पोलिसांनी वेळ न दवडता हालचाली सुरू केल्या.
पोलिसांनी तासवडे टोलनाका येथे तातडीने सापळा रचला. संशयित पांढऱ्या रंगाची ह्युंदाई वेरना कार टोलनाक्यावर येताच पोलिसांनी ती अडवली. वाहनाची तपासणी केली असता त्यामध्ये तीन संशयित आढळून आले. पोलिसांनी तिन्ही जणांना वाहनासह ताब्यात घेतले. त्यामुळे रायगड जिल्ह्यातील गुन्ह्यानंतर दुसऱ्या जिल्ह्यातून पलायन करण्याचा त्यांचा प्रयत्न फसला.
ताब्यात घेण्यात आलेल्या आरोपींची नावे निशांत बंडू पाटील (वय ३५, रा. खराळे, पोस्ट काळुंद्रे, ता. शिराळा, जि. सांगली), अमर जयसिंग पाटील (वय ३६, रा. नांदगाव, ता. कराड, जि. सातारा) आणि संग्राम शिवाजी पाटील (वय ३३, रा. काले, ता. कराड, जि. सातारा) अशी आहेत.
ही कारवाई पोलीस अधीक्षक निखिल पिंगळे, अपर पोलीस अधीक्षक डॉ. वैशाली काडकर आणि कराड उपविभागीय पोलीस अधिकारी राजश्री पाटील यांच्या मार्गदर्शनाखाली तळबीड पोलीस ठाण्याचे प्रभारी अधिकारी रवींद्र भोरे यांच्या नेतृत्वाखाली करण्यात आली.
या कारवाईत पोलीस उपनिरीक्षक सुभाष फडतरे, हवालदार राघू खाडे, योगेश भोसले, सचिन गुरव, पोलीस कर्मचारी अभय मोरे, प्रवीण गायकवाड आणि संजय मासाळ यांनी सहभाग घेतला.
परजिल्ह्यातील गुन्ह्यातील आरोपी सातारा जिल्ह्यातून पलायन करण्याच्या प्रयत्नात असताना तळबीड पोलिसांनी अचूक माहितीच्या आधारे केलेली ही कारवाई पोलिसांच्या सतर्कतेचे आणि आंतरजिल्हा समन्वयाचे उदाहरण ठरली आहे.
